mujhe maluum hai ki tanashah takht se chipka hai
uske har gulam ke haath me khanjar hai
galiyan laal rang ki holi khel chuki hai
raatein barood ki khushboo aur bambo ki awaaz ko diwali maanti hai
maut ke saayein bhatak rahe hai tanha; utne hi tanha jitne jeevit the
nyay mar chuka hai; insaaniyat yaha se jaa chuki hai
whataboutery karte karte hum history ho chuke hai
itihaas ki aad me bhavishy savar raha hai;
ameer aur ameer hokar desh ka gaurav badha raha hai
gareeb itna gareeb ki khud khushi bhi nahi khareed paa raha hai
id-diwali ki debate me rozi roti gum hai;
nehru-savarkar ke beech ambedkar.
mujhe maloom hai ki middle class phone se chipka hai;
selfies lene me itna mast hai ki bas tv pe khabaro ko time deta hai
kabhi thoda waqt nikaal le to news me batae gaye dushmano ko gaali de deta hai
upper class ki gossip karte karte lower class ko achche se farsh ki safai karne ko bolta hai;
uncle ji apni incompetencies ko compensate karne ke liye hridy samrat purush ki badai kar khud ko samrat purush samajh lete hai
khoon kharaabe se durr rehnna pasand karta hai humara college jaane vala ladka; par khoon kharaabe ki picture me jab ladki ko hero thappad maarta hai to taali sabse tez bajata hai;
privilige me dooba hai humara upper class; par sunna hai victim banke dikhaye to incentive milte hai
ab ye incentive kya hai aur kyu hai nahi maloom; par dekha hai kamzor aur gareeb maang rahe ho to hum bhi maang lete hai;
caste-religion tab hi discuss aur debate karo jab hum dab rahe ho
hum daba rahe ho apne se kamzor ko tab mat pucha karo achcha nahi lagta
whataboutery to tyaar hai hi: 2002 ke liye 1984; savarkar ke liye gandhi; fascist ke liye pseudo;
jo murda hai unko baatein karne do: nehru jawab dega; jeevit to vaise hi apne tanashah ke liye chup hai.
opinions to vahi dekhne hai jo humare pre formed bias ko aur strong kare
aaj ke tanashah ki raksha ke liye purane tanashah ginva do;
aur iss sab ke beech kuch jo hamse alag hai jala do.
hum pe to vaise hi karavahi honi nahi; jail me to vahi hai jinhone tanashah ke khilaf awaaz uthai hai
humare laal kapdo ki white washing tanashah kar dega;
pata nahi bachpan me laundry me kaam karte the?
mujhe maluum hai har bhatka hua dharam se chipka hai;
dharam ki aad me jo collectiveness mehsoos hoti hai; identity mehsoos hoti hai; uske liye marne aur maarne ko tyaar hai;
khud ko theek aur dusre ko galat thehrane ko; fatt fatt dharam kaise mahaan hai ki post lagane ko; hamesha tyaar hai;
khud ki gali me aurato ke saath kya vyavhaar ho raha hai nahi maloom hokar bhi chup rehna hai;
suna hai dusre desh me humare jaise hi log hai; same team hui na? unke liye awaaz uthane ko fatt tyaar hai;
khud ki gandagi to baad me saaf kar lenge pehle dusro ke ghar kitne gande hai dekh kar khud ko better feel kara lein?
dusre desh ke dharam dikha kar apne desh me dharam ke naam par gand to machane do;
khud ka rang aur dusre ka rang alag hai dhyaan rakho;
dhang pe mat jaao: apna tanashah sambhaal lega.
jitna baant sakte hai baant lo: rang pe, bhasha pe, identity pe: baant lo.
jitna baantenge utna hi to aage badh paenge.
usa ka meme dekha, bro? “i identify as a spoon. lol; kuch bhi!”;
isko use karke jo lgbtq bina naukri ke, discrimination me dabba pada hai aur dabao;
tanashah ke strict orders hai: bas dharam-dharam har taraf hone do; aur beech beech me humor daal do; memes are in: moye moye pe sabko bhatka do.
oversensitivity ka majak udao; apne ko to insensitive rehna hi hai.
ameer dono taraf ke jab tak victim mehsoos karenge theek rahega; stories share karke achcha feel kar lenge; gareeb hi to marna hai dono taraf ka;
han caste pe baat mat jaane dena; vo kuch wrestlers bethi thi na jantar mantar par? mat aane dena;
manipur pe baat mat aane dena; parliament pe baat mat aane dena;
aise muddo pe baat mat ane dena; humari moral responsibility banti hai desh hitt ke liye.
mujhe maloom hai ki tanashah takht se chipka hai;
par tumhe ye maloom hona chahiye ki tanashah ke takht ko palatne ka waqt aa gaya hai.
Himanshu Chakravarty Sharma / मंच 