ek baat pe jal gaye
ek baat pe badal gaye
chalte raste mud gaye
beech mausam dhal gaye
ye pyaar nahi, kuch aur hi tha
ye saath nahi, kuch aur hi tha
ye tere mere rishte ka ek
anjaana sa daur hi tha
vo tu kuch aur hi thi
vo main kuch aur hi tha
sitaaro me lipti raatein
jab aayi chand ki giraft me
to chandni me lupt si thi
jab izhaar ko anjaam pe le jaana tha
to aakhir kyu gum si thi?
ke vo bhi koi raat hi thi
vo bhi koi baat hi thi
vo tere mere rishte ka ek
anjaana sa daur hi tha
vo tu kuch aur hi thi
vo main kuch aur hi tha.
phir na jaane kya hum par beeti
aur ab yun hai ki main hun ek khaane me
tum ho ek khaane me
beech ke kitne khaane khaali hai
ye javed sahab ne kahi thi
humne jee hi
aur agar baat ankahi hi rahe
to vo bhi sahi hai
kyunki na kahe shabdo me
jazbaat koi aur hi tha
aur beech me jo bhi sabne kahi
dhyaan mat do, bas shor hi tha
vo tere mere rishte ka ik
anjaana daur hi tha
vo to tu hi kuch aur thi
par han, main bhi shayad kuch aur tha
Himanshu Chakravarty Sharma / मंच 